3月底就係財政年度完結，近期好多廣告、身邊的保險代理朋友，都叫大家買延期年金，話可以扣稅。但人人都叫買延期年金，唔通人人都啱買咩。說實在，近日我見有些人是不需要買的，卻走去買了。有些人有需要買，但就偏偏不買。所以今次特別做了這個特輯，講講延期年金買唔買得過，有關邊啲人需要買延期年金，只要大家買前先問自己4個問題，就知道是否有需要買。
影片重點：
雖然買延期年金有最高6萬元的扣稅上限，但留意這不是慳到的稅，而是扣稅額。想知道自己攞唔攞得盡呢6萬蚊扣稅額，就要先問下自己4個問題，睇下有冇需要買。
問題1: 你的人工是否夠高？
如果你是高薪一族，交17%的稅階，買延期年金可以當年立即慳1萬稅。有咩投資可以投資6萬蚊，即刻慳1萬先？仲未計你份年金本身的回報。所以高薪一族係沒理由唔買。但如果你本身只是交2%稅的人，只交幾百蚊稅，其實又冇乜需要買﹗如果大家連1蚊都唔想益個政府，咁其實可以諗諗買份細細地既年金，岩岩夠冚課稅金額就得啦。
問題2：你是否有足夠免稅額？
有啲人係好多免稅額，有齊哂阿爸阿媽及子女，曾有朋友試過有接近70萬免稅額，佢地月入唔多過5.5萬都唔洗交稅，咁佢地就無需買啦。但有些人像我一樣，只得一個單身基本人士免稅額，即係月入多過萬幾蚊就要開始畀稅，買一份年供6萬的年金，就等於有多半個個人免稅額，冇理由又唔買。
問題3: 未來五年是否收入穩定？
因為延期年金最少供五年，而且不能斷供，雖然個別保險公司有保費假期，但最多只得2年，如果斷供基本上是會蝕本。所以即將退休，或是不確定未來是否有足夠財力連繳五年保費，便要考慮清楚，或轉用可扣稅強積金供款(TVC)，供款會更彈性。
問題4：你有沒有其他投資渠道？
坊間的延期年金大部分內部回報率在2%至4%左右，如果你自問識投資，每年能賺超過5%回報，其實有機會賺得比延期年金回報多，未必需要買延期年金。但如果你自問對投資沒有信心，買延期年金就像造一份每年有約3%回報的定期存款，而且一做便是15至20年，比起每年要到銀行續存定期存款，來得方便及划算。
影片中會有更詳細的分析及例子講解，有興趣可以觀看影片。
聲明：本文及影片僅分析誰人適合買延期年金，並不構成任何投資邀約。
Comments are closed.